bach-bacha kar jism se bhaga koi
girti diwaron ki zad mein tha koi

is qadar dast-e-rasai se gurez
hum na sahil hain na tum dariya koi

laut aate dasht-e-tanhai se hum
shahr mein aawaz to deta koi

sare din cigarette ke margholon mein band
raat bhar khwabon ka qaidi tha koi

mere dariya tu shanawar ko na bhul
dekh to tah mein teri duba koi

wo bhi hai lafzon ke mahbas mein asir
in lakiron se nikal aata koi