hazin dil ka wijdan bhi le lo
karo ishq irfan bhi le lo

ghazal kah raha hun ghazal par main
suno mere arman bhi le lo

pukaro mujhe nam se mere
mera aaj haijaan bhi le lo

utha kar zara nawak-e-mizhgan
meri jaan meri jaan bhi le lo

sarayat karo meri hasti mein
yun tum meri pahchan bhi le lo

wajud-e-wafa ka taqaza hai
mohabbat mein paiman bhi le lo

meri ruh pyasi hai sadiyon se
mere jism ka man bhi le lo

agar kufr ka dar na hota to
main kah deta iman bhi le lo

sada hai ye wahshat ki ai 'azfar'
shab-e-gham ka ilhan bhi le lo