bad-tar hai maut se mera jina tere baghair
duniya nahin hai ab meri duniya tere baghair

kuchh bhi raha na zist ka qissa tere baghair
khamosh yan zaban hain goya tere baghair

be-raunaqi jumud tattul sukut-e-marg
aisa hai kaenat ka naqsha tere baghair

yaksui-e-khayal ki ab lazzaten kahan
dar dar bhatak rahi hai tamanna tere baghair

barbaadiyon se rabt ajal se hai saz-baz
sar-garmiyan junun ki hain kya kya tere baghair

be-kar hai har ek parastish jo tu nahin
barbaad hain kunisht-o-kalisa tere baghair

thi dil se hi kashakash-e-naz-o-niyaz sab
hoga na husn-o-ishq ka charcha tere baghair

hansna teri nazar ke tabassum ke sath tha
ab zakhm zakhm hai mera rona tere baghair

lachaar ho ke baith gain chaara-saziyan
hoga tera mariz na achchha tere baghair

yak-bargi zamane ki raftar ruk gai
bhula hai waqt aah guzarna tere baghair

name se tere kya ho parayon ko wasta
apna hua na jab koi apna tere baghair