badan mein phul khile dard ne visal kiya
aziyyaton ki mahak ne mujhe nihaal kiya

charagh aaya nazar to nazar pighalne lagi
hum ahl-e-chashm ne yun aag ka khayal kiya

main chal raha tha magar sans ruk gai meri
guzarte waqt ne aisa ajab sawal kiya

har ek shakhs tha matam-kunan so main ne bhi
udas rang pahan kar khizan ko shaal kiya

use chhua to dhanak ki girah khuli aise
nafis lams ne poron mein intiqal kiya