us ko meri tadap ka guman tak nahin hua
main is tarah jala ki dhuan tak nahin hua

ye chahte the maut hi hum ko juda kare
afsos apna sath wahan tak nahin hua

tum ne to apne dard ke qisse bana liye
hum se to apna dard bayan tak nahin hua

hairat hai wo bhi shahr basane ki zid mein hai
tamir jis se apna makan tak nahin hua

taswir teri lafzon se ban sakti thi magar
hum se hi tera zikr yahan tak nahin hua