bade shad the zindagani se pahle
magar sach to ye hai jawani se pahle

ye kaisi ghata hai ki tauba-kashon mein
barasne lagi aag pani se pahle

mujhe mujrim-e-ishq farmane wale
zara puchh apni jawani se pahle

samajhta na tha koi raaz-e-mohabbat
mere aansuon ki rawani se pahle

nigahon ne dekha hai daur-e-masarrat
magar ishq ki mehrbani se pahle

uthate na hum zindagani ki neamat
samajhte agar zindagani se pahle

agar rokna tha mohabbat se 'shakir'
to taklif karte jawani se pahle