badla hua duniya ka chalan dekh raha hun
tahzib ke mathe pe shikan dekh raha hun

tu ne jo gira lin rukh-e-pur-nur pe zulfen
suraj ke bhi chehre pe gahan dekh raha hun

wo mujh se wafaon ki sanad mang rahe hain
main jin ko yahan ahd-shikan dekh raha hun

phulon mein na pahli si wo khushbu hai na wo rang
bhaunron ko giraftar-e-mehan dekh raha hun

jis ahd mein fankar ki izzat nahin baqi
main aaj wahi daur-e-fitan dekh raha hun

sahra ho ki gulzar gira deta hai bijli
kya taur tere charkh-e-kuhan dekh raha hun

ab rind bhi aise mein badal jaen to behtar
badla hua saqi ka chalan dekh raha hun

atwar zamane ke ajab ho gae 'gauhar'
ismat ki kalai mein rasan dekh raha hun