bahbud-o-madad ki wo sanad se nikal aae
kuchh pet gharibon ki rasad se nikal aae

un ko main khuli aankhon se ab dekh raha hun
kuchh khwab meri nind ki zad se nikal aae

bachpan ki haden tod de chal umr ke ham-rah
ab to tere bachche tere qad se nikal aae

raste mein zamane ne bichha rakkhe the kante
hum apne iradon ki madad se nikal aae

mat dhundh mere dost tabassum mere lab par
ab kaise ye aaghosh-e-lahad se nikal aae

'khalid' mere jazbaat ki shiddat mein kami thi
aansu bhi meri aankhon ki had se nikal aae