bahi-khwahon ka mansuba mukammal ho gaya hota
jo main bahra nahin hota to pagal ho gaya hota

bhala ho dushmanon ka jo mujhe sargarm rakhte hain
na hote ye to main guzra hua kal ho gaya hota

ana ne dur rakkha dosti ke faiz se us ko
gale mil leta wo badh kar to sandal ho gaya hota

sanbhaala zindagi bhar ai ghazal tere taqaddus ko
na hote hum to maila tera aanchal ho gaya hota

'shakil' ehsas ki daulat agar mujh ko nahin milti
main apni zat mein kab ka muqaffal ho gaya hota