bahut hai naz tujhe shahd ke hain nal tere hont
karen jo kar saken sairab dil ka thal tere hont

ruwan-ruwan hama-tan-gosh ho ke sunta hai
sukhan-sukhan teri aankhen ghazal-ghazal tere hont

ye kaenat ki talkhi ko thukne wale
bala ka sabr kiye jaen gar hon phal tere hont

sukut-e-dahr meri shah-rag katar jata
agar na hilte meri jaan bar-mahal tere hont

bahaar bhar di hai tujh mein 'zubair' kya us ne
bahut gulab giraate hain aaj-kal tere hont