bahut hi dil-nashin aawaz-e-pa thi
na jaane tum the ya baad-e-saba thi

baja karti thin kya shahnaiyan si
khamoshi bhi hamari jab nawa thi

wo dushman hi sahi yaro hamara
par us ki jo ada thi kya ada thi

sabhi aks apna apna dekhte the
hamari zindagi wo aaina thi

chala jata tha hansta khelta main
nigah-e-yar meri rahnuma thi

chalo tuti to zanjir-e-mohabbat
musibat thi qayamat thi bala thi

na hum badle na tum badle ho lekin
nahin jo darmiyan wo chiz kya thi

mohabbat par udasi chha rahi hai
hai kya anjam aur kya ibtida thi

shagufe phutte the dil se 'naushad'
ye wadi pahle kitni pur-faza thi