bahut ruswa kya is aashiqi ne har gali mujh ko
liye phirti rahi har ja ye meri bekasi mujh ko

chhupae se nahin chhupti haqiqat khul hi jati hai
sar-e-bazar le aai meri diwangi mujh ko

khabar kya thi yahi ek din qayamat mujh pe dhaegi
pasand aai thi bachpan mein teri ye sadgi mujh ko

nigah-e-naz ne un ki mujhe ek armughan bakhsha
mila darbar-e-ulfat se shuur-e-zindagi mujh ko

dil-o-jaan-o-jigar qurban main ne kar diye sare
rulati hi rahi akasr teri beganagi mujh ko

'jalali' jada-e-ulfat mein jab se hai qadam rakkha
rahi un ke tasawwur mein hamesha bekali mujh ko