bahut sukun se dil mein basa ke le aae
hum aaj un ko unhin se chura ke le aae

wo war karte rahe muskura ke nazron ka
hum apni jaan salamat bacha ke le aae

hamein khabar thi ki aaine ki tarah hai wo dil
tha pattharon mein magar hum utha ke le aae

sawal ye tha ki sabit karo wafadari
to hum hatheli pe ye sar saja ke le aae

jahan har ek taraf kufr kufr phaila tha
ki hum wahan se bhi iman bacha ke le aae

ab us ke hath mein hai faisla 'sharar-naqwi'
ghazal ke sheron ko hum dil bana ke le aae