baitha hun dil ke dagh numayan kiye hue
muddat hui thi ghar mein charaghan kiye hue

puchho na mujh se shahr-e-nigaran se kya mila
phirta hun apna chaak gareban kiye hue

bhulenge hum na aap ke jaur-o-sitam kabhi
baithe hain apne sine mein pinhan kiye hue

ek bar aur haal mera dekh jaiye
muddat hui hai aap ko ehsan kiye hue

aaj aap aa ke bakhsh den rangini-e-hayat
muddat hui hai jashn-e-charaghan kiye hue