baithi thi kisi shakh pe jab raat ki titli
udti thi hawaon mein khayalat ki titli

nadan se bachche ne use qaid kiya tha
kamzor hui thi mere jazbaat ki titli

yak-lakht hui jism ke mahlat mein ru-posh
majbur bahut thi mere haalat ki titli

jazbon ki mahak ruh ke phulon mein nahin thi
thi waqt ki har shakh pe khatraat ki titli

logon ne tarah-dar gulabon ko chhupaya
jab main ne udai thi hidayat ki titli

shab-bhar mere afkar ki dahliz mein 'jami'
thak-haar ke soti rahi jazbaat ki titli