ban ke yusuf main kabhi zer-e-qafas jata hun
kabhi majnun ki tarah dasht mein phans jata hun

jab bhi uthte hain teri yaad ke shoale dil se
khaal bachti hai main andar se jhulas jata hun

apne hisse ke ujale bhi use deta hun
khud andheron mein ujalon ko taras jata hun

khwab ban ke main guzarta hun kai aankhon se
phir jo bhati hai usi aankh mein bas jata hun

ban ke uthta hun bukharaat dil-e-tanha se
phir main aankhon ki ghataon se baras jata hun