banae hazrat-e-insan ne is din ke kai madfan
mili munkar ko aazadi lage maruf par qadghan

hue hain mimbar-o-mehrab hi tafriq ke markaz
zabanon ne pahan rakkhi hai khasta-haal si utran

mulukiyyat ibarat khun se aahon se ashkon se
hukumat ke andheron ko khilafat hi kare raushan

tujhe tha fakhr ki shoalon pe teri hukmrani hai
magar ye dekh chingari jalati hai tera khirman

in arbab-e-hukumat ka koi rishta hai qatil se
watan se jab wo nikle kucha-e-qatil bana maskan

khushi thi un ko ye uftad un par to nahin guzri
hati chilman to pai hai wahi aandhi lab-e-rauzan

yahi hai minhaj-e-nabawi yahi kar-e-nubuwwat hai
ki insan ki ghulami se rahe aazad har gardan

umiden justuju khwab-o-tamanna ki haqiqat kya
agar tu be-amal be-hausla phir ye bhi sar-afgan

ai 'tabish' tu nifaz-e-hukm-e-rabbani agar chahe
to ho aaghaz hukama se tariqa hai yahi ahsan