band kamre mein hun aur koi daricha bhi nahin
kisi dastak ka larazta hua jhonka bhi nahin

tirgi odh ke aai hai ghata ki chadar
aur fanus koi aah ka jalta bhi nahin

kal mere sae mein sustai thi sadiyon ki thakan
aaj wo ped hun jis par koi patta bhi nahin

dhup ke dasht ka darpesh safar hai mujh ko
sath dene ko magar koi parinda bhi nahin

apna khun rah mein phailain lakiron ki tarah
aane wale na kahin naqsh-e-kaf-e-pa bhi nahin