bandagi karte karte khuda ho gaya
aadmi ko khuda jaane kya ho gaya

wo sitamgar khuda-e-wafa ho gaya
tujh ko ai ghairat-e-ishq kya ho gaya

aa ki tarikh-e-dil phir murattab karen
fikr-e-mazi na kar jo hua ho gaya

zindagi hi mujhe chhod kar chup nahin
khud bhi hairan hun main ye kya ho gaya

hum bahaaron ki minnat hi karte rahe
rang-e-gulshan hua tha hawa ho gaya

chupke chupke mera zikr hota raha
rafta rafta har ek aashna ho gaya

tujh se to qurb hai tere dar par to hain
hum khuda tak na pahunche to kya ho gaya

zist thodi bahut kaam aane lagi
kuchh na kuchh maut ka aasra ho gaya

kis tajassus mein 'anjum' pareshan ho
sath kab tha jo koi juda ho gaya