bani thi kuchh ek us se muddat ke baad
so phir bigdi pahli hi sohbat ke baad

judai ke haalat main kya kahun
qayamat thi ek ek saat ke baad

mua kohkan be-sutun khod kar
ye rahat hui aisi mehnat ke baad

laga aag pani ko daude hai tu
ye garmi teri is shararat ke baad

kahe ko hamare kab un ne suna
koi baat mani so minnat ke baad

sukhan ki na taklif hum se karo
lahu tapke hai ab shikayat ke baad

nazar 'mir' ne kaisi hasrat se ki
bahut roe hum us ki rukhsat ke baad