barae-pas-e-adab khak baith sakti hai
tu baithi kyon nahin jab khak baith sakti hai

abhi to qafila sahra mein chal raha hai miyan
ye baith jaega tab khak baith sakti hai

khala ke par gaya hai koi sawar kahin
udi hai rashk se kab khak baith sakti hai

wo jis ke sar pe chadhaya tha khak-e-imkan ko
usi hawa ke sabab khak baith sakti hai

‘ajam se aai hui ek khwahish-e-khaki
ba-pesh-e-shah-e-'arab khak baith sakti hai

mere hi dam se udi phir rahi thi sahra mein
main uth raha hun so ab khak baith sakti hai