barson aankhon mein rahe aankhon se phir kar dil mein aae
rah sidhi thi magar pahunche bade chakkar se aap

kat gae lakhon gale is tezi-e-raftar se
ab to chal nikle ziyaada apne bhi khanjar se aap

apne sine se daba dije zara sina mera
chur kije shisha-e-dil ko isi patthar se aap

hazrat-e-zahid nikal aaya falak par aaftab
pir-o-murshid ab to uthiye mai-kade ke dar se aap

kyon janab-e-'dagh' yaad-allah meri yaad hai
bhes badle raat ko aate the kis ke ghar se aap