barson baad mila to us ne hum se puchha kaise ho
shahr-e-nigaran ke markaz the tanha tanha kaise ho

wo kuchh mere dard ko bante main kuchh us ke gham le lun
aisa ho to kya achchha ho lekin aisa kaise ho

chehre par jo hariyali thi wo shahron mein zard hui
ganw ka mukhiya puchh raha hai mere bhayya kaise ho

uthti hui maujon ke niche kitna gahra pani hai
hum jaise kuchh log na duben to andaza kaise ho

tez-o-tund hawa ke hathon kya bite ye baat alag
shakhen jab tak sath na chhoden patta pila kaise ho