chashm-e-tar hai sahab hai kya hai
ashk gauhar hai aab hai kya hai

marna jina janab hai kya hai
har-nafas inqalab hai kiya hai

zahar phaila faza mein nafrat ka
ye siyasat ka bab hai kya hai

jam-e-duniya ko munh laga kar dekh
zahar hai ya sharab hai kya hai

sinf-e-nazuk ye tabsira kijiye
khar hai ya gulab hai kya hai

hum se aalam ki puchh asliyat
ye haqiqat hai khwab hai kya hai

kaun jaan adaon mein us ki
bachpana hai shabab hai kya hai

wo 'waqar' aap ka murassa-e-'hilm'
be-nuqat ek kitab hai kya hai