bas gaya jab se aa ke tu mujh mein
ek khushbu hai chaar su mujh mein

aaina dekh ke main chaunk pada
koi mujh sa hai hu-bahu mujh mein

khud mein khud ko kahan talash karun
bas tu hi tu hai chaar-su mujh mein

khud ko taraj kar ke baitha hai
ek wahshi lahu lahu mujh mein

ho ke khamosh us ko sunta hun
hai koi mahw-e-guftugu mujh mein

sach kahun aaj tak bhi zinda hai
tujh ko pane ki aarzu mujh mein