bas itna wasta hai mera zindagi ke sath
jaise ki ajnabi ho koi ajnabi ke sath

ghabra ke mujh se ai shab-e-hijran juda na ho
hai teri zindagi bhi meri zindagi ke sath

ab shauq-e-justuju hai na hai dard-e-arzu
jine ko ji raha hun magar be-dili ke sath

aaya hun mai-kade mein badi tishnagi liye
saqi pila de aaj tu dariya-dili ke sath

'akhtar' ab un ki bazm ka ahwal kya kahen
begana aadmi ho jahan aadmi ke sath