bas yahi ek kami 'uruj pe thi
zist mein tishnagi 'uruj pe thi

soch wo aankh tak mila na saka
kis qadar bebasi 'uruj pe thi

aap ke aane se zara pahle
dil mein tira-shabi 'uruj pe thi

hosh aate hi ye khayal aaya
be-sabab be-khudi 'uruj pe thi

kaise jhukte nahin ana wale
us taraf 'ajizi 'uruj pe thi

samne aap the mere murshid
aur idhar mai-kashi 'uruj pe thi

dil shikasta tha dil girafta tha
par meri sha'iri 'uruj pe thi