basarat se nahin kuchh aur hi pahlu se raushan hai
jo sach puchho to rasta nafa-e-ahu se raushan hai

batane ki nahin phir bhi sar-e-mahfil batata hun
masham-e-jaan-o-dil mera usi khushbu se raushan hai

yad-e-musa pe koh-e-tur pe kya kya na raushan tha
tajjub hai ki ye duniya magar jadu se raushan hai

andhera bastiyon mein hai magar apna to virana
ghubar-e-rah se aur kuchh ram-e-ahu se raushan hai

ye sach hai khana-e-farhad teshe se hi raushan tha
charagh-e-chashm-e-shirin bhi udhar aansu se raushan hai