basti mein zindagi ke nishan tak nahin rahe
aisi hawa chali ki makan tak nahin rahe

sailab sath le gaya sahil ko is liye
tinkon se mera rabt wahan tak nahin rahe

suraj hansa to raat ke sae tamam-tar
yun mit gae ki un ke nishan tak nahin rahe

apna shuur-o-fikr hai apni udhed-bun
hum log ab kisi pe garan tak nahin rahe

ki jin ke izz-o-shan ki tarif umr bhar
wo chahte hain meri zaban tak nahin rahe

bachche bhi man ki baat se ab muttafiq nahin
chulha jale to ghar mein dhuan tak nahin rahe

us ne kalam aise hunar se kiya 'asar'
lafzon ke tir sirf zaban tak nahin rahe