bata ai dil ki nalon se hua kya
tere rone se wo but dar gaya kya

jo tum par mar mita marne se pahle
wo kya jaane baqa kya hai fana kya

na samjhe hum to ab tak is qadar bhi
ki un ki zulf-e-pur-kham hai bala kya

wo kahte hain naqab-e-rukh hata kar
haya-o-sharm se ab wasta kya

mera dil le ke mujh se phir gae tum
koi aisa bhi matlab-ashna kya

nahin aur han pe apna faisla hai
hamari ibtida kya intiha kya

khade hain chup dam-e-akhir mere sab
atibba kya aziz-o-aqriba kya

nahin is daur mein koi kisi ka
kisi ki ab shikayat kya gila kya

na rakhte ho hunar koi na daulat
batao to karoge tum 'ata' kya