bayan ghairon se apna gham karen kya
namak ko zakhm ka marham karen kya

nae mausam ke khake hain nazar mein
guzashta fasl ka matam karen kya

utarta hi nahin hai us ka jadu
batao khud pe padh kar dam karen kya

use hum kis tarah dil se nikalen
ye dil sunta nahin to hum karen kya

hum us ki be-rukhi ka zikr kar ke
use kuchh aur bhi barham karen kya

hamein jabran hi jina pad raha hai
bata ai gardish-e-paiham karen kya

ghamon ki dhup mein jab jal chuke hain
khushi ki chhanw ka 'alam' karen kya