bazm-e-rang-o-nur mein sahib-nazar koi nahin
dekhne wale bahut hain dida-war koi nahin

hum ko wirse mein mila hai wo makan ajdad se
jis mein diwaren hi diwaren hain dar koi nahin

har gali kuche mein ab shams-o-qamar bikne lage
ab kharidar-e-charagh-e-chashm-e-tar koi nahin

yun takhayyul mein haqaeq ki milawat ho gai
ab fasanon mein bhi harf-e-mo'tabar koi nahin

main nai manzil ko nikla hun purani rah par
mere hamrahi bahut hain ham-safar koi nahin

ahl-e-dil to khair sab sud-o-ziyan mein pad gae
kya khirad-mandon mein bhi aashufta-sar koi nahin