be-gunah qatl hote jate hain
sabr ka imtihan hai shayad

marne walon ko bhul jate hain
jaan hai to jahan hai shayad

wo kabhi mere dil mein rahte hain
ye bhi un ka makan hai shayad

apni hasti bhi yan hai koi chiz
ek wahm-o-guman hai shayad

hai jo har shai mein har jagah maujud
wo khuda be-nishan hai shayad

shaikh huron pe jaan dete hain
dil abhi tak jawan hai shayad

jin ka phika hai be-maza pakwan
un ki unchi dukan hai shayad