be-haqiqat duriyon ki dastan hoti gai
ye zamin misl-e-sarab-e-asman hoti gai

kis kharabi mein hua paida jamal-e-zindagi
asl kis naql-e-makan mein raegan hoti gai

tangi-e-imroz mein aainda ke aasar hain
ek zid badh kar kisi sukh ka nishan hoti gai

dusre rukh ka pata jis ko tha wo khamosh tha
wo kahani bas isi rukh se bayan hoti gai

ek sada utthi to ek aalam hua paida 'munir'
ek kali mahki to pura gulsitan hoti gai