be-karani thi pas-e-bab-e-muqaffal qaid tha
ishq ka mara kisi gham mein musalsal qaid tha

wo harim-e-dil se bahar tha magar us ka khayal
dil ke andar hi kisi khane mein bekal qaid tha

aakhirash us ko bhi ab suli pe latkaya gaya
zindagi bhar jo pas-e-diwar-e-maqtal qaid tha

misl-e-barkash zindagi jita tha raha durr-e-yatim
wo rihai ke dinon mein bhi mukammal qaid tha

ek pal bas ek pal dekha tha us mahtab ko
aankh ke parde mein bas wo ek hi pal qaid tha