be-kasi-e-sahar-o-sham pe hans deta hun
ghurbat-e-gardish-e-ayyam pe hans deta hun

tan ho tanz ho tahqir ho ya ho tazlil
un ki har baat pe har kaam pe hans deta hun

rote hain saghar-e-labrez bhi le kar kuchh rind
main magar apne tahi jam pe hans deta hun

qissa-e-dard ko karte hue zabt-e-tahrir
rote rote bhi tere nam pe hans deta hun

zist mein jab nahin aati kisi unwan pe hansi
aap apne dil-e-nakaam pe hans deta hun

har tarah khatir-e-sayyaad hai manzur 'kalim'
dil to hai mail-e-kohram pa hans deta hai