be-khudi hai na hoshiyari hai
baada-khwari si baada-khwari hai

husn masruf-e-parda-dari hai
jaane ab kis nazar ki bari hai

tu ne dekhi to hogi ai naseh
wo mohabbat jo ikhtiyari hai

kam nahin shorish-e-nafas lekin
zindagi par jumud tari hai

gham-e-ulfat to dil se haar chuka
ab gham-e-zindagi ki bari hai

jis chaman mein kabhi na aae bahaar
us chaman ki khizan bhi pyari hai

hae wo baada-kash ki jis ne 'shakil'
zindagi be piye guzari hai