be-mausam hi aankhon mein bhar jate hain aansu bhi to chaalaki kar jate hain dil ka sauda un ke bas ki baat nahin aune-paune dam laga kar jate hain har din zinda rahne mein hai kharch bahut aao chalo ek do din ko mar jate hain qatl ujale bhi kar dete hain lekin sab ilzam andheron ke sar jate hain kaise ji lete hain log andheron mein hum to sirf tasawwur se dar jate hain reza reza hona un ki qismat hai su-e-falak jo be-baal-o-par jate hain