be-rahm dil ki himaqaton ke asir hain
tabhi sar-nigun hain nadamaton ke asir hain

shab-e-wasl ishq ki chandni ka ghurur the
wahi log hijr ki wahshaton ke asir hain

hue sar ba-kaf hain jo aandhiyon ki udan par
ye charagh ishq ki hurmaton ke asir hain

jinhen apni quwwat-e-zabt pe kabhi naz tha
wahi ashk dard ki shiddaton ke asir hain

koi ishq tha jo kisi ke jaane se mar gaya
koi zakhm hijr ki iddaton ke asir hain

jinhen ai khuda teri aayaton se hi bughz hai
wahi bahr-o-bar ki najasaton ke asir hain

kahan wo zamin ko suna sake hain nida-e-dil
mere lafz arsh ki wusaton ke asir hain

jinhen dan kar ke chale gae ho azab-e-jaan
wo ana-parast se ibraton ke asir hain

hami sher likhte hain tir-o-neza ki nok par
hami sar-phire hain baghawaton ke asir hain

kabhi tum naya koi zakhm do ki suna sakun
abhi sher gham ki samaaton ke asir hain

wo khuda-parast 'khalil' jo sar-e-dar hain
hum unhi ke qurb ki lazzaton ke asir hain