be-sada dam-ba-KHud faza se Dar

be-sada dam-ba-khud faza se dar
khushk patta hai to hawa se dar

kore kaghaz ki sadgi pe na ja
gung lafzon ki is rida se dar

aasman se na is qadar ghabra
tu zamin ki saza jaza se dar

jaane kis khunt tujh ko le jaen
shahzade nuqush-e-pa se dar

tark-e-dast-e-talab pe mat itra
apne dil mein chhupe gada se dar

arsh tak bhi udan hai apni
hum parindon ki bad-dua se dar

aarzu ek nae janam ki na kar
itni lambi kadi saza se dar