be-soz-e-nihan mahw-e-fughan ho nahin sakta
jab tak na lage aag dhuan ho nahin sakta

wade ko nibhaenge ye wada hai hamara
qaul apna kabhi teri zaban ho nahin sakta

hain sainkadon dil taj-mahal aaj bhi lekin
nazzara tujhe shah-e-jahan ho nahin sakta

aankhen hi nahin qabil-e-didar wagarna
us yar ka didar kahan ho nahin sakta

juz tere koi rahat-e-dil rahat-e-jaan aur
ai rahat-e-dil rahat-e-jaan ho nahin sakta

'purnam' abhi arman hain bahut khana-e-dil mein
khali ye makinon se makan ho nahin sakta