be-zamiri ka pata deta raha
zarf tha khali sada deta raha

dekhne ki hum ne zahmat hi na ki
hath mein wo aaina deta raha

chashm-e-nam ranj-o-mehan ke sath sath
waqt hum ko tajraba deta raha

aur kya karta gharibon ka ilaj
padh ke pani par dawa deta raha

sun ke wo karte rahe the an-suni
phir bhi main un ko sada deta raha

ai 'sada' mujh ko to bas mera yaqin
har qadam par hausla deta raha