'bedar' karun kis se main izhaar-e-mohabbat
bas dil hai mera mahram-e-asrar-e-mohabbat

har bul-hawas us jins ka hota haiga khwahan
jaan-bakhta-khwan howen kharidar-e-mohabbat

ai shaikh qadam rakhiyo na is rah mein zinhaar
hai subha-shikan rishta-e-zunnar-e-mohabbat

karte hain abas mujh dil-e-bimar ka darman
wabasta meri jaan se hain aazar-e-mohabbat

bach jaun is aazar se 'bedar' gar ab ki
hunga na kabhi phir main giraftar-e-mohabbat