bhid mein bhi main hi nikla aap apna aashna
aaina-khane mein hoga kaun kis ka aashna

rang us ka dhul gaya to odh li main ne naqab
jo tha dushman mera kal tak aaj nikla aashna

puchhta hai aksar aaine se wo apna pata
jis ne dar par apne likkha tha zamana-ashna

ab to bas rahta hai meri aahaton ka muntazir
ho gaya hai pas ke ghar ka daricha aashna

tishnagi apni bujha li us se sahra ne 'salim'
ho nahin paya samundar se wo dariya aashna