mera wajud 'azabon ki dhup-chhanw mein tha
zamin ki qaid se nikla to main khalaon mein tha

pila ke zahr andhere ka pi gaya amrit
libas-e-khizr mein jo shakhs rahnumaon mein tha

waraq ulat de kabhi hans ke chhin le wo kitab
usi ka rang nai mausami hawaon mein tha

thahar ke dam na le har samt hain sarab yahan
hua hai zard wo pauda jo sard chhanw mein tha

nadi pe khet mein panghat pe har jagah maujud
usi ke sath raha jab 'salim' ganw mein tha