bhul jaun main ada kaise us harjai ki
jis ne khushbu ki tarah meri pazirai ki

yaad jab us ki chali aai meri rahon mein
laj rakh li hai usi ne meri tanhai ki

aise ujda hai tere baad mere dil ka jahan
achchhi lagti nahin aawaz bhi shahnai ki

daud jati hai lahar si mere dil ke andar
yaad jab aati hai us shokh ki angdai ki

khun-e-dil apna pilaya jo ghazal ko main ne
tab kahin ja ke zamane ne pazirai ki