bichhad ke tujh se mili ye nai saza mujh ko
tere firaq ne jina sikha diya mujh ko

qadam qadam pe naya rasta mila mujh ko
yaqin aa gaya bhula nahin khuda mujh ko

tamam umr ki tanhaiyon ka hasil hai
visal-e-zat kiya jis se aashna mujh ko

main apne panw se chadar samet leta hun
barahnagi ka taqaza hai dhanpna mujh ko

wo mere qatl ke ilzam se bari nikla
aur apni sari khataen bhi de gaya mujh ko