bichhde hain kab se qafila-e-raftagan se hum
mil jaenge kabhi na kabhi karwan se hum

rah rah ke puchhte hain yahi baghban se hum
le jaen chaar tinke kahan aashiyan se hum

majbur kis qadar hain dil-e-bad-guman se hum
dekhe koi ki chup hain khade be-zaban se hum

allah re uruj-e-takhayyul ke hausle
chal kar makan se badh gae kuchh la-makan se hum

baad-e-khizan ne rang-e-chaman kya uda diya
aakhir ko nikle khak-basar bostan se hum

kis munh se hath uthaen duaen hain be-asar
phir bhi hai dil mein chhed karen aasman se hum

wo mai pilai saqi ne hain jis se hosh-e-gham
jagen na jagen dekhiye khwab-e-giran se hum

wo sarzamin kahan ki na ho gardish-e-falak
mumkin nahin ki bach ke rahen aasman se hum

aakhir junun mein mil gain daman ki dhajjiyan
le aae un ko wadi-e-wahshat-nishan se hum

kam-maegi mein nazil hai ijz-o-niyaz par
ab kya uthaen sar ko tere aastan se hum

kaisi chamak kahan ki khatak uf re be-hisi
hain mast zauq-e-lazzat-e-dard-e-nihan se hum

majbur dil tha hukm-e-qaza-o-qadar se 'shauq'
ab kya bataen aae yahan phir kahan se hum