bina dekhe tujhe apna bana kar dekh leta hun
main tere aastan par sar jhuka kar dekh leta hun

suna hai raaz chahat ka chhupana sakht mushkil hai
teri taswir aankhon mein chhupa kar dekh leta hun

andhere dil ki basti ke bhi shayad dur ho jaen
main tere nam ki mashal jala kar dekh leta hun

shikayat doston ki hai mere ahbab ke lab par
chalo ab dushmanon ko aazma kar dekh leta hun

wo gul jaan-e-bahaar-e-arzu hai log kahte hain
use shakh-e-tamanna par saja kar dekh leta hun

mujh kuchh bhi nahin hasil hua unchi udanon se
qadam apni zamin par ab jama kar dekh leta hun

dua apne liye main ne kabhi mangi nahin koi
teri khatir main hath apne utha kar dekh leta hun

paron mein un ke kitni taqat-e-parwaz baqi hai
parinde apni sochon ke uda kar dekh leta hun

kahan pahunchega mera karwan-e-shauq ai 'shahid'
main apne aap ko rahbar bana kar dekh leta hun