bojh sa badh jata hai dil par sham-dhale
ruk jati hain sansen pal-bhar sham-dhale

khil uthta hai us ki yaad ka ek ek rang
jag uthte hain kya kya manzar sham-dhale

aag mere shiryanon ki lau dene lagi
pighla us ki ana ka patthar sham-dhale

gahre honge sargoshi ke sae abhi
khul jaega lipta bistar sham-dhale

kis ko bataun gum hai meri apni pahchan
mujh se juda hai mera paikar sham-dhale

ek aandhi sa ghatta badhta shor-e-nafas
bhar jata hai zehn ke andar sham-dhale

dil ke ek goshe mein simat aate hain 'ramz'
saton aasman saton samundar sham-dhale